上個月政府出咗加密貨幣嘅資訊總結，成個總結好長，唔係三言兩語講得完，如果大家有興趣可以按以下連結：<...

上個月政府出咗加密貨幣嘅資訊總結，成個總結好長，唔係三言兩語講得完，如果大家有興趣可以按以下連結：https://www.fstb.gov.hk/fsb/tc/publication/consult/doc/consult_conclu_amlo_c.pdf

基本上嚴重打擊加密貨幣市場在香港的發展，尤其是刻意提高門檻至專業投資者等，連蘋果日報財經版都有專題探訪。

我都認識一部份加密貨幣業界嘅朋友，佢哋大部份都覺得資訊嘅結論有改善空間，但係不知所措，走投無路。坊間缺乏一個同政府交流嘅渠道和平台，基於我係一個財經專欄作家，佢哋覺得我有少許媒體影響力，所以搵我幫手。

我都唔係傻嘅，現在香港咁樣嘅氣氛，政府同民間已經失去一個有效嘅溝通渠道，反對派已經變成連壓力團體都不如嘅組織。針對一啲金融議題，只能夠直接同建制派接觸，而我認識嘅建制派基本上只有一個，就係葉劉淑儀，而大致上肯見我嘅建制派，也可能只有佢一個。

曾經香港電台視點31係可以容許價值觀唔同嘅人係一個公開論壇上面針鋒相對，交流意見，不過大家都知道香港電台已經隨着社會氣氛有所改變。呢一種針對個別議題嘅交流渠道已經消失咗。

我想參考返一些大家都會接受嘅做法。

以前我見葉劉嘅時候，都會公開講出嚟，收集一下大家嘅意見，無論鬧佢嘅，辱罵佢嘅，我都會show俾佢睇。可以參考以下連結：
https://www.facebook.com/322991677859013/posts/1348151812009656/?d=n

我今次公開講出嚟，係因為目標為本，要如實反映加密貨幣業界意見，平衡市場發展同監管。我都希望見面交流有所得益，更加唔想令人產生誤會，令人覺得我有私心，要巴結權貴。現實我唔係公眾人物，亦冇公權力，見一個人唔需要搞到咁，只係我對自己有所約束同要求，要光明磊落交代，透明公開。到時假如成功見面，我都唔會多拿佢一塊餅乾，我最多淨係飲水。

我已經搜集左部份業界嘅意見，亦都歡迎大家將你哋對加密貨幣嘅睇法PM我

---